Доживотен затвор за Трајче Бојковски побара Јавното обвинителство пред Основниот суд во Куманово, каде што беа изнесени завршните зборови во судскиот процес во кој тој е обвинет за четири убиства и два обиди за убиство. Пресудата за овој случај треба да биде официјално изречена на следното судско рочиште.
Јавниот обвинител Љубомир Лапе истакна дека Бојковски, кој работел како овчар, наместо да ги штити немоќните, се претворил во нивен предатор. Според наводите во обвинението, тој ги избирал своите жртви исклучиво меѓу постари жени и ги напаѓал во моменти кога биле сами во своите домови или на осамени места.
„Доказите неспорно покажуваат дека Станче Каревска, Јанка Антевска, Марија Маринковска и Мира Станковска биле убиени на ист начин, со давење и притисок врз градниот кош. Кај дел од нив се констатирани и повреди во пределот на половите органи, а ДНК-траги од обвинетиот се пронајдени кај две од жртвите и кај една од преживеаните“, рече Лапе.
Двете жени кои успеале да ги преживеат нападите, Слоботка Арсовска и Росанка Трајковска, во своите сведочења детално опишале дека биле ненадејно фатени за вратот, соборени на земја и давени од страна на напаѓачот.
Обвинетиот Бојковски пред судот не го признава единствено убиството на Станче Каревска. Сепак, јавниот обвинител посочи дека при првичното давање исказ обвинетиот навел прецизни детали за времето и за начинот на извршување на делото кои целосно се совпаѓале со форензичките наоди од истрагата.
„Таквите детали не можеле да му бидат познати на никој освен на сторителот“, рече Лапе.
Обвинителството во завршните зборови се повика и на изготвеното судско-психијатриско вештачење, според кое Бојковски е целосно пресметлив и покажува развиена способност за прикривање на трагите. Кај него е констатирано целосно отсуство на емпатија, каење и срам, а стручните наоди укажуваат и на висок ризик од повторување на истите кривични дела.
Како пример за обид за манипулација, обвинителот го наведе однесувањето на обвинетиот пред судскиот совет, тврдејќи дека на претходното рочиште се колнел во Алах иако е од православна вероисповед, претпоставувајќи дека претседателот на Судскиот совет е муслиман врз основа на неговото име и презиме.
Лапе објасни дека за делото за кое се товари Бојковски законски е потребен и посебен мотив, односно ниски побуди, кои во овој случај се поврзани со сексуална девијација, додека сите други околности се ценети како отежнувачки.
„Во конкретниот случај, тоа е некрофилијата“, рече Лапе.
Адвокатката на дел од оштетените семејства, Драгана Илиевска-Тодоровиќ, оцени дека приложените докази недвосмислено го поврзуваат Бојковски и со убиството на Каревска, кое тој упорно го негира.
„Не се сомневаме дека Судот правилно ќе ги цени доказите и ќе донесе одлука за добро на општеството“, изјави Илиевска-Тодоровиќ.
Одбраната, застапувана од адвокатот по службена должност Тони Цветковски, посочи дека начинот на извршување и повредите претставуваат само индиција, но не и доволен доказ за вина сам по себе. Сепак, тој ги наведе како несоборливи материјални докази биолошките траги под ноктите чиј ДНК-профил се совпаѓа со обвинетиот.
Во врска со двете преживеани жени, Цветковски оцени дека од нивните искази не може докрај да се утврди директната умисла на обвинетиот, па побара Судот при одмерувањето на казната да ги земе предвид признанието на вина за дел од делата, неговата возраст и фактот што претходно не бил кривично осудуван. Основниот суд во Куманово пресудата ќе ја објави на претстојното рочиште.