Од синдикатот на Клинички предупредија: Ако за една недела нема решение, ќе има протест

Синдикатот на Клинички ќе чека уште една недела за средба со новиот министер за здравство во спротивно повторно ќе излезат на протест.

Се надеваат на разбирање и исполнување на ветеното зголемување на платите бидејќи новиот министер за здравство  Фатмир Меџити доаѓа од комплексот клиники.

-Ветија 10 процентно зголемување секоја година, за три години тоа се 30 проценти, а досега платите се покачени само за 5 проценти, изјави Д-р Предраг Серафимовски, потпретседател на Синдикатот на Клинички.

Во меѓувреме, новиот предлог закон за системот за плати во јавниот сектор ги обедини сите синдикати, сојузи и конфедерации. Тие бараат Владата да го повлече ваквото законско решение бидејќи се уништуваат правата на синдикатите и колективните договори и се намалуваат правата на работниците за повисоки плати.

-Со овој закон се уништуваат правата на Синдикатите, правата на колективните договори, изјави Благоја Ралковски, претседател на КСС.

-Ваквото законско решение не смее да помине и е катастрофално за работничките права, изјави Слободан Трендафилов од ССМ.