Во познатото туристичко место Кападокија во Турција, во непосредна близина на Музејот на отворено во Гореме, се урна дел од светски познатите карпести формации познати како самовилски оџаци. Според првичните информации од терен, животот го загубиле три лица, од кои две се брачен пар од Турција, додека третата жртва е странска туристка чиј идентитет и националност сè уште не се утврдени.
Жртвите останале затрупани под тешките карпести блокови што се одрониле на локалитетот. Во инцидентот уште пет лица се здобиле со полесни телесни повреди, а информацијата официјално ја потврди турскиот министер за здравство Кемал Мемишоглу.
До одронот дошло откако обилните врнежи од дожд предизвикале сериозно лизгање на земјиштето на карпестиот терен, соопшти гувернерот на провинцијата Невшехир, Хусеин Кок. На теренот во Гореме веднаш се упатени припадници на полицијата, жандармеријата, тимови од националната агенција за управување со катастрофи и вонредни состојби, како и здравствени екипи, кои активно продолжуваат со потрагата и спасувачките активности за евентуално загрозени или исчезнати лица.
Поради лошите временски услови проследени со силен дожд и интензивен ветер, туристичките летови со балони на топол воздух, кои претставуваат една од главните атракции во регионот на Кападокија, се привремено откажани.