Јавните обвинителства ја следат состојбата на гласачките места и ги истражуваат сите пријави за можни нерегуларности и кривични дела
Според информации од јавните обвинителства низ целата држава, денешниот изборен ден од Локалните избори 2025 засега се одвива мирно и без значајни нарушувања на изборниот процес. Од почетокот на гласањето до јавните обвинителства и на посебната електронска адреса izbori@jorm.mk не се пријавени инциденти или неправилности на гласачките места кои би претставувале кривично дело, информира Обвинителството.
Јавен обвинител од Основното јавно обвинителство (ОЈО) Струмица денеска добил усно известување за погрешно испечатени гласачки ливчиња во Ново Село. Се извршен разговор, а Државната изборна комисија е известена да го замени материјалот. Според досегашните сознанија, нема елементи на кривично дело.
Во текот на вчерашниот ден, поединечни настани со наводи за изборен поткуп биле евидентирани во ОЈО Велес, ОЈО Прилеп, ОЈО Крива Паланка и ОЈО Свети Николе. Во сите случаи се преземаат дејствија согласно насоките на јавен обвинител за проверка на наводите.
Иако се регистрирани неколку настани поврзани со прекршување на изборниот молк, досега вкупниот број на вакви случаи е многу мал и не го загрозува текот на изборниот процес.
Привремената Комисија на Јавното обвинителство за следење на евентуални изборни нерегуларности и денеска ја следи целата изборна процедура, а електронската адреса izbori@jorm.mk останува отворена за пријави за кривични дела кои би можеле да го нарушат изборниот процес.
Во сите основни јавни обвинителства се организирани вонредни дежурства, а јавните обвинителства тесно соработуваат со останатите институции надлежни за следење на изборите.
Сите пријави за сомнителни кривични дела ќе бидат истражени со приоритет, а предметите ќе се обработуваат веднаш по нивното поднесување, нагласуваат од Обвинителството.