Традиционалниот минхенски фестивал Октоберфест забележа историски рекорд, откако манифестацијата ја посетија вкупно 7,4 милиони луѓе, кои испиле дури 6,7 милиони литри пиво. Претходниот рекорд го држеше изданието од 2023 година со 7,2 милиони гости, додека минатата година низ портите поминаа околу 6,5 милиони посетители, што претставува зголемување за приближно 900.000 гости за само една година.
Високата посетеност резултираше и со масовна потрошувачка на пијалоци. За време на одржувањето беа испиени околу 6,7 милиони кригли пиво од по еден литар, со што потрошувачката се зголеми за 2,7 проценти во споредба со ланските 6,5 милиони литри, додека продажбата на безалкохолни пијалоци забележа раст од десет проценти.
Овогодишниот 191-ви Октоберфест траеше од 19 септември до 4 октомври, а најголемо зголемување на посетеноста беше забележано во текот на работните денови. Според официјалните податоци од градските власти во Минхен, бројот на гости од понеделник до четврток се зголемил за 18,5 проценти во првата недела, а во втората недела скокнал за дури 28,9 проценти.
Организаторите го припишуваат успехот на исклучително поволните временски прилики, како и на специјалната кампања која апелираше до публиката да доаѓа во текот на работната недела со цел да се растоварат традиционално преоптоварените викенди. Меѓу странските туристи најбројни беа државјаните на Соединетите Американски Држави, Италија и Австрија. Организациските тимови нагласија дека новиот безбедносен концепт и контролата на движењето спречиле создавање неконтролиран метеж на фестивалскиот простор.
Огромната посетеност донесе и низа необични статистички податоци. Персоналот спречил и вратил дури 105.000 оригинални кригли за пиво што гостите се обиделе нелегално да ги изнесат надвор од комплексот. Службата за изгубени предмети регистрирала околу 4.000 пронајдени работи, меѓу кои повеќе од 1.000 парчиња гардероба, речиси 700 паричници и околу 450 лични документи.
Во текот на 16-те фестивалски дена биле потрошени приближно 2,65 милиони киловат-часови струја, а посетителите зад себе оставиле околу 92 тони смет. Зголемена побарувачка регистрираа и угостителите во големите шатори, каде прометот со храна пораснал за два до три проценти, а традиционалното печено пилешко повторно се покажало како најбаран специјалитет.
Директорот на фестивалот, Кристијан Шарф, изјави дека Октоберфест претставува животна желба за огромен број луѓе ширум планетата. Според официјалните најави, следното издание на најпознатиот пивски фестивал ќе се одржи во периодот од 18 септември до 3 октомври 2027 година.