Обединетите нации започнаа иницијатива за обезбедување безбеден транзит на ѓубрива низ Ормускиот теснец, предупредувајќи дека нарушувањата веќе имаат последици врз земјоделството во повеќе делови од светот.
Иницијативата ја предводи Канцеларијата на ОН за проектни услуги (UNOPS), која во изминатите две недели одржала состаноци во Њујорк со земјите-членки за воспоставување механизам за сигурно движење на комерцијални бродови што превезуваат ѓубрива.
Како што изјави директорката за комуникации на UNOPS, Жулиет Тума, разговорите ги води извршниот директор Хорхе Мореира да Силва и тие сè уште се во тек. Целта е да се овозможи непречен транспорт на клучни суровини и да се ублажат потенцијалните хуманитарни последици, особено во земјите во Азија и Африка.
Веќе се забележуваат конкретни ефекти на терен. Дел од земјоделците во Јужна Америка ја прескокнале втората сеидба на пченка, додека во Африка постои ризик од значително послаба жетва поради недостиг на ѓубрива.
Според извори вклучени во разговорите, компаниите бараат решение што ќе ја врати слободата на пловидба без воена придружба и дополнителни трошоци, со можност механизмот подоцна да се прошири и на други видови стока.
Агенцијата за храна и земјоделство на ОН предупредува дека падот на танкерскиот сообраќај за повеќе од 90 проценти сериозно го загрозува глобалното земјоделско производство и снабдувањето со храна.