Пратениците во рускиот парламент повикаа Москва да користи помоќно оружје за да ги постигне целите во Украина, соопшти денес претседателот на Државната дума, Вјачеслав Володин.
Како што објави Володин на својот Телеграм-профил, пратениците инсистираат на ескалација на воените средства што ѝ стојат на располагање на Русија.
„Пратениците на Државната дума инсистираат на употреба на помоќно оружје, „оружје за одмазда“ и на постигнување на целите на специјалната воена операција“, напиша Володин.
Во меѓувреме, британскиот весник „Телеграф“ објави дека Кина ѝ помага на Русија во развојот на нова хиперсонична ракета. Според написот, ракетата може да достигне брзина поголема од 12.800 километри на час.
Весникот наведува дека за изработка на боевите глави се користат специјализирани машини и алатки. Нивната вредност, според проценките, надминува 7 милијарди фунти.
Русија веќе двапати ја употребила хиперсоничната ракета „Орешник“, која може да носи нуклеарно оружје, во војната во Украина. Првиот напад бил регистриран во 2024 година.
Вториот напад се случил претходно овој месец. Тогаш била погодена цел во Лвов, град кој се наоѓа на околу 65 километри од границата со Полска, земја членка на НАТО.
Володин не прецизираше на каков тип „помоќно оружје“ конкретно се однесуваат повиците на руските пратеници.