Токсичната пуферска риба (Lagocephalus sceleratus) повторно е фатена во Јадранското Море. Најновиот примерок бил уловен вчера во близина на Сплит, а пред неколку дена сличен случај е регистриран и во јужниот дел на Јадранот, пренесуваат хрватските медиуми.
Експертите предупредуваат дека станува збор за исклучително опасен вид чија консумација може да биде смртоносна. Рибата содржи тетродотоксин – многу силен отров што може да предизвика сериозни здравствени последици, а во одредени случаи и смрт.
Рибарите и граѓаните се повикуваат на претпазливост. Доколку се улови пуферска риба, се препорачува внимателно ракување и избегнување директен контакт. Освен што е отровна, оваа риба има силна вилица со многу остри заби, па нејзиното каснување може да предизвика сериозни повреди.
Иако засега е релативно ретка во Јадранското Море, експертите предупредуваат дека нејзината бројност може да се зголеми во иднина. Покрај неа, во последните години во Јадранот сè почесто се среќава и светулката (Pterois miles), инвазивен вид кој веќе е широко распространет во јужниот и централниот дел на морето.
Ширењето на ваквите видови е дел од поширок процес што научниците го нарекуваат тропикализација на морето – постепена промена во составот на морските видови поради навлегување на организми од потоплите мориња.
Експертите ги повикуваат рибарите и граѓаните да пријавуваат секој улов или забележување на оваа риба, бидејќи следењето на нејзината појава е важно за разбирање на промените во екосистемот на Јадранското Море.