ОПАСНО ЈА СПУКАА: Трамп сака да ја продаде својата Тесла по кавгата со Маск

Трамп ја купил својата Тесла како поддршка за Маск, но сега размислува да се откаже од неа

Американскиот претседател Доналд Трамп размислува да ја продаде својата Тесла, изјави висок функционер од Белата куќа за телевизијата Си-Би-Ес. Црвениот електричен автомобил го купил за, како што било наведено, да му помогне на Илон Маск во промоцијата на компанијата „Тесла“. Возилото било паркирано во Белата куќа неколку недели, но сега Трамп се дистанцира од сопствената одлука.

Одлуката за продажба доаѓа откако односите меѓу двајцата се влошија. Причина за тоа се критиките на Маск кон новиот закон за буџетот. Според извори од Белата куќа, токму тие критики ја поттикнале новата ескалација во нивниот однос.

Жестока расправија меѓу двајцата, со навреди и откажана средба

Трамп вчера се скарал со својот поранешен советник, кој финансиски ја поддржа неговата кампања со 250 милиони долари. Пресметката започнала во Белата куќа, кога Трамп јавно изразил разочараност од Масковите изјави. По тој момент, двајцата започнале отворена вербална пресметка преку социјалните мрежи.

Иако првично било најавено дека ќе се одржи директен разговор, Трамп потоа ја откажал средбата.

„Воопшто не размислувам за Илон. Кутриот си има проблем. Тој е човек кој го изгубил умот и не планирам наскоро да разговарам со него“, изјави Трамп, алудирајќи дека ситуацијата е сериозна и дека нема интерес да продолжи со комуникацијата.

По серијата навреди, Илон Маск сè уште нема јавно одговорено на последните коментари на Трамп. Од неговиот тим не е издадена ниту официјална изјава, ниту неформална реакција.

Во меѓувреме, Трамп не ја користи својата тесла. Иако ја набавил за да ја поддржи автомобилската визија на Маск, сега автомобилот, според извори од администрацијата, стои некористен. Продажбата на возилото, според истиот функционер, е реална опција и активна тема во Белата куќа.