Над 3.200 пријави за самовработување во рамки на оперативниот план

Над 3.200 пријави за самовработување се поднесени досега, информираше заменик-министерот за економија и труд Марјан Ристески за време на работната посета во Неготино, каде беше презентиран Оперативниот план за вработување.

На настанот присуствуваа невработени лица, млади и претприемачи, кои беа запознаени со мерките од Планот, а самовработувањето беше посочено како една од најатрактивните. Ристески ги повика сите заинтересирани да го искористат периодот за аплицирање, кој трае до 20 јуни.

Самовработување како централна мерка во рекордниот план од 40 милиони евра

– Ги повикувам неготинчани, за кои знам дека се креативни, да се охрабрат и да ги приложат своите бизнис идеи. Се надевам дека голем дел од нивните бизнис планови и идеи ќе бидат реализирани со овој оперативен план, изјави Ристески.

Заменик директорката на Агенцијата за вработување, Весна Пешова, истакна дека Оперативниот план е клучен документ на институцијата.
– Документот ја изразува нашата заложба за инклузивен и развоен пазар на труд, за намалување на невработеноста, зголемување на вработеноста и создавање на одржливи работни места, рече Пешова.

Детали за мерките за самовработување, поддршка и обуки

В.д. директорката на Агенцијата за поддршка на претприемништвото, Даниела Димовска, ја појасни постапката за самовработување и условите за користење на мерките. Поддршката вклучува:

  • Финансиска помош до 430.500 денари (7.000 евра) за лица над 29 години, за 610 апликанти.

  • Поддршка до 615.000 денари (10.000 евра) за млади до 29 години, наменета за 720 лица.

  • Мерка за самовработување во партнерство (регистрација на ДОО со 2 лица), со поддршка од 861.000 до 1.230.000 денари, за 400 лица, од кои 220 се млади.

За сите одобрени апликанти се предвидени обуки за претприемништво, изработка на бизнис-план и поддршка при регистрација на бизнис.

Информативниот ден во салата на Советот на Општина Неготино беше дел од кампањата за промоција на мерките за 2025 година.
Присутните се информираа и за останатите мерки на Министерството за економија и труд, кои оваа година располагаат со рекордни 40 милиони евра. Главниот фокус е ставен на младите и создавање на нови работни места.


Над 3.200 пријави за самовработување досега во рамки на Оперативниот план за вработување 2025. Рокот за аплицирање е до 20 јуни, достапни се три мерки со финансиска и структурна поддршка.