Министерот за надворешни работи Бујар Османи кој е во прва работна посета на Сараево, денеска се сретна со заменик-претседателот на Советот на министри и министерка за надворешни работи на Босна и Херцеговина, Бисера Турковиќ.
Како што соопшти МНР, на средбата, меѓу другото, беше изразено задоволство за високиот степен на пријателски односи меѓу двете држави, досегашната билатерална соработка, како и заложбата за нејзино натамошно надградување со нови содржини и динамика, согласно блискоста на двете земји и граѓани.
На средбата Османи посебно се осврна на евро-атлантската перспектива на регионот на Западен Балкан, пренесувајќи ја безрезервната поддршка за амбициите на Босна и Херцеговина на тој пат.
-Се надевам дека многу скоро, Босна и Херцеговина ќе добие кандидатски статус за членство во Европската унија, за што нашата држава е подготвена да го сподели своето знаење и искуство. Тоа е секако важно за граѓаните на земјата, но воедно преставува и интерес за сите земји од регионот, нагласи Османи.
Османи посочи дека процесот на европска интеграција, претставува силен поттик за спроведување на потребните реформи, и најдобриот начин земјите од регионот да ги достигнат европските цивилизациски придобивки.
Во современото безбедносно и геополитичко окружување, од клучно значење за стабилноста на регионот е да се обезбеди засилено и кредибилно присуство на Европска Унија и НАТО, што ќе преставува значајна инвестиција во идната безбедносна архитектура на Континентот, оцениле соговорниците.
Во однос на билатералната соработка, се наведува, беа разменети мислења, предлози и сугестии за конкретни проекти, со посебен акцент на интересот и потребата од засилување на трговската размена, каде значаен импулс може да даде организирањето на бизнис форуми меѓу економските партнери од двете држави, како и присутноста на деловните субјекти во едната и другата држава. Еден од предизвиците на економската соработка, се додава, може да биде и заедничкото учество на компаниите на двете земји на трети пазари.
За време на престојот во Сараево, се посочува, Османи беше примен и од претседaвачот на претседателството на Босна и Херцеговина, Шефик Џаферовиќ.