Граѓаните кои работеле во странство ќе доставуваат докази за данок
Директорката на УЈП, Елена Петрова, по средбата со Сојузот на стопански комори, истакна дека граѓаните кои работеле во странство се должни да ги пријават своите приходи и платен данок.
Таа појасни дека оваа обврска важела уште од 2020 година, но многумина денес се соочуваат со потешкотии при обезбедување докази за платен данок во странство. Петрова нагласи дека УЈП презема мерки да им излезе во пресрет, вклучувајќи прием на сите видови докази и покренување административна соработка со странски даночни администрации.
Доставување документи и проверки на даночни обврски
Од околу 1.100 граѓани кои работеле во Авганистан и Ирак, околу 200 веќе доставиле потребни документи. За останатите, УЈП побарала листи и податоци од компаниите за да може службено да ги провери.
Дополнителни проверки ќе се вршат и за граѓаните испратени во мировни мисии, каде данокот бил платен преку Министерството за одбрана.
Петрова најави дека аконтациските решенија за 2020 година ќе бидат заменети со конечни решенија и дека процесот на корекции ќе мирува додека не се добијат сите потребни податоци.