Меѓу приоритетните проекти за реализација во наредниот градоначалнички мандат кандидатот на ВМРО-ДПМНЕ и Коалицијата, Кирил Пецаков, ги најави реконструкцијата на дел од булеварот „Туристичка“, како и изградбата на пречистителната станица за фекална канализација во Трпејца.
Како што посочува Пецаков, реконструкцијата на делот од „Туристичка“ значително ќе го подобри изгледот и функционалноста на градот.
Проектот предвидува нови тротоари, целосна реконструкција на велосипедските патеки, модерно и ефикасно јавно осветлување, поставување нови клупи за одмор и канти за отпадоци.
-Потегот на булеварот од улицата „Стив Наумов“ до улицата „Јане Сандански“ ќе биде трансформиран во вистинска урбана зона, насочена кон пешаците, велосипедистите и модерните стандарди, вели тој.
Пецаков порачува дека заложбите за заштита на животната средина не се само декларативни, туку реални дела.
-По децениска потреба, во тек е изградбата на пречистителна станица во Трпејца. Ова е круцијален проект за чиста околина. Продолжуваме со решавање на клучните инфраструктурни проблеми. Како приоритетен проект за наредниот мандат е изградбата на секундарна канализациона мрежа во село Трпејца. Со ова, систематски ја заштитуваме нашата околина и езерото. Продолжуваме со посветена работа за поквалитетен живот и чиста животна средина, вели Пецаков.