Пливач исчезна при препливување на Босфор за време на традиционалната интерконтинентална трка, се известува од Турскиот олимписки комитет
Пливач исчезна при препливување на Босфор, информира денеска Турскиот олимписки комитет. Станува збор за 29-годишен руски натпреварувач кој исчезнал во неделата додека учествувал на годишното традиционално пливање преку теснецот.
Трката, во организација на Турскиот олимписки комитет, оваа година го одржа своето 37-то издание. Пливачите ја препливаа патеката долга 6,5 километри, која е предизвикувачка поради силните струи што го делат азискиот и европскиот брег на Босфорот. Во трката учествуваа над 2.800 натпреварувачи од 81 земја.
„Тесно соработуваме со крајбрежната стража и полицијата за да го расветлиме овој инцидент“, соопшти Турскиот олимписки комитет.
„Трката завршува два часа откако последниот пливач ќе влезе во водата. На крајот, целата патека беше проверена и утврдено е дека нема други пливачи во водата“, додадоа организаторите.
За време на трката, бродскиот и товарниот сообраќај низ Босфорот биле привремено прекинати.
Босфорот ја поврзува Црното Море со Мраморното Море, а преку Дарданелите со Егејското и Средоземното Море, што го прави важен и стратешки воден премин во регионот.