По шест години од нивното заминување од кралските должности, принцот Хари и Меган Маркл наводно повторно размислуваат за поголема поврзаност со Велика Британија. Според медиумските наводи, војводата и војвотката од Сасекс сакаат да поминуваат повеќе време во земјата, но без целосно враќање во рамките на кралските обврски.
Како што пишува „Тајм Индиа“, извори блиски до парот тврдат дека Хари и Меган се обидуваат да ги подобрат односите со кралското семејство и да им овозможат на своите деца, Арчи и Лилибет, подобро да се поврзат со британското наследство.
Средба со кралот Чарлс по неколку години
Дополнителни шпекулации за можно приближување се појавија по информациите дека кралот Чарлс Трети, кралицата Камила, принцот Хари, Меган Маркл и нивните деца неодамна се сретнале на чај во кралската резиденција „Хајгроув Хаус“.
Тоа, според медиумите, била првата посериозна средба на кралот со неговите внуци по неколку години, период обележан со заладени односи, јавни интервјуа, судски спорови и објавувањето на мемоарите на Хари.
„Хари не сакаше да ги разочара децата, тие беа многу возбудени за патувањето. Досега со Чарлс разговараа само преку камера, па ова беше нивната прва вистинска шанса да се гушнат“, изјавил извор близок до семејството.
Оддалечување од американскиот живот
Како една од причините за можната промена на плановите се наведува дека Хари и Меган почнале да се чувствуваат изолирано во САД.
„Во неговиот круг на пријатели дефинитивно постои чувство дека Хари почна да се чувствува малку непожелно во Америка. Нивниот американски сон полека се лади. Англија е местото каде што секогаш било срцето на Хари“, изјавил извор близок до принцот.
Според истиот извор, Хари и Меган заминале во САД со цел да го искористат неговото кралско потекло, но Меган сега наводно се чувствува како „аутсајдер“, поради што ја поддржува идејата за повторно поврзување со семејството на Хари.
Португалија како отскочна штица за враќање во Европа
Во меѓувреме, за полесно да се вратат во Европа, а истовремено да избегнат дел од проблемите поврзани со животот во Лондон, Хари и Меган наводно изградиле куќа во луксузен и приватен дел од Португалија.
Домот, кој според медиумите го уредува познатиот клуб „Soho House“, би требало да им служи како база од која нивните деца ќе бидат поблиску до британските роднини, додека Лондон би им бил достапен за неколку часа со авион.
Хари, според наводите, планира почесто да престојува во Велика Британија од септември поради хуманитарни активности, а во иднина со него подолги периоди би можеле да престојуваат и Меган и децата.
Кралската палата засега не ги коментира овие информации, но според медиумските извештаи, се создава можност за ново поглавје во односите меѓу двете страни на Атлантикот.