Почина легендарниот американски глумец Халк Хоган. Итна помош била испратена во неговиот дом во Клирвотер, Флорида, во раните утрински часови. Имало пријава за срцев удар. Според последните информации, пред куќата биле неколку полициски возила и брза помош, а Хоган бил изнесен на носилка и однесен во болница.
Само пред неколку недели, неговата сопруга Скај ги негираше шпекулациите дека Хоган е во кома, велејќи дека неговото срце е силно и дека се опоравува од неколку операции. Еден месец претходно, се појави информација дека „умира“, но потоа се тврдеше дека станува збор за компликации по операцијата на вратот во мај, според светтските агенции.
Хоган првпат беше примен во Куќата на славните на WWE во 2005 година, но беше отстранет во 2015 година поради скандалот што избувна кога протече снимка што содржеше расистички коментари, снимени без негово знаење за време на интимна врска.
Тој беше примен во Куќата на славните на WWE по втор пат во 2020 година – овој пат како член на NWO.
Хоган имаше и значајна филмска кариера, која започна во 1982 година со улогата на Тандерлипс во филмот Роки III.
Тој беше и ѕвезда на популарното реално шоу „Хоган знае најдобро“ на телевизијата VH1. Таму публиката можеше да го следи неговиот секојдневен живот со неговото семејство.
Поради бројните повреди во текот на кариерата, Хоган имаше голем број операции. Во интервју со Харви Левин, тој изјави дека практично повеќе нема никакви оригинални делови од телото.