Здравствена грижа за најмладите унапредена со поддршка од Амбасадата на Јапонија
Со поддршка од Амбасадата на Јапонија, Клиниката за детски болести во Скопје доби нов дигитален мобилен рендген апарат во вредност над 60.000 евра. Овој значаен придонес беше промовиран на настан на кој присуствуваше државниот секретар во Министерството за здравство, д-р Бесим Мемеди. Тој изрази благодарност до јапонската амбасадорка Сецуко Кавахара за, како што рече, „личниот ангажман и долгогодишната пријателска и плодна соработка“.
„Оваа донација е уште еден доказ за силното партнерство меѓу нашите две земји и за вистинската грижа на Јапонија кон градење отпорен и хуман здравствен систем“, изјави д-р Мемеди.
Придобивки за илјадници деца
Амбасадорката Кавахара потсети дека досега, во рамки на заедничката соработка, се реализирани над 70 проекти во здравствениот сектор. Таа посочи дека поддршката од Амбасадата на Јапонија за Детската клиника претставува долгорочна инвестиција во здравјето на децата низ целата држава.
Директорот на Клиниката, д-р Реџеп Мемеди, се заблагодари за донацијата. Тој истакна дека новата опрема ќе овозможи побрза, поквалитетна и безбедна дијагностика за повеќе од пет илјади деца годишно, кои се лекуваат на оваа терциерна установа.
„Новата апаратура за нас претставува чекор напред во унапредување на здравствената грижа за најмладите пациенти“, рече д-р Мемеди.
