Американската војска интензивно ги преместува системите за противвоздушна одбрана „Патриот“ од Тексас директно во регионот на Блискиот Исток. Истовремено се спроведува операција за повлекување на војниците од базите што биле најмногу изложени на директни напади. Воените сили на терен ги надополнуваат залихите со муниција, додека стратешките бомбардери и борбените авиони вршат подготовки за потенцијални воздушни напади. Следниот месец се очекува уште една ударна група на носачи на авиони и специјализирани единици на морнарицата да ѝ се приклучат на армадата од околу дваесетина воени бродови во регионот, иако дел од бродовите би можеле да бидат повлечени.
Трамп сè уште нема донесено конечна одлука за преземање офанзивни дејствија, но според упатени извори се наклонува кон масовен напад по изборите, со фокус врз иранската инфраструктура и нуклеарните постројки. Постои и алтернатива за дипломатско решение и постигнување договор, но досегашните напори на регионалните посредници не резултираа со конкретни поместувања.
„Можеби ќе направиме уште една мала операција „Епски бес“. Или ќе се согласат“, изјави Трамп.
Белата куќа одбива да дава коментари за чувствителни воени планови и нагласува дека остануваат отворени сите можни опции со цел да се спречи Техеран да развие нуклеарно оружје. Претходно беше посочено дека нема да има напад пред одржувањето на изборите. Израел исто така има подготвено детални планови и таргетирани цели за воздушен удар, при што Нетанјаху останува на ставот за континуиран притисок насочен кон ослабување и соборување на тамошниот режим.
Обновата на воздушните операции би значела дополнителен пресврт по заострувањето на санкциите и поморската блокада, мерки со кои со месеци се сопира продажбата на иранска нафта, се прекинуваат воздушните врски и се редуцира копнената трговија. Одредени безбедносни аналитичари изразуваат сомнеж дека новите удари ќе го принудат Техеран на капитулација, посочувајќи дека во најинтензивната фаза од војната земјата издржа повеќе од 20.000 напади од САД и Израел, продолжувајќи со акции против бродови во Персискиот Залив и напади врз бази.
Според поранешниот израелски разузнавач Дени Цитринович, верувањето дека нов бран бомбардирања може да го собори режимот претставува сериозна грешка, бидејќи нападите би можеле дополнително да го мотивираат Техеран за развој на ракетните и нуклеарните капацитети. Сет Џонс од Центарот за стратешки и меѓународни студии смета дека Трамп би можел да прогласи воена победа и да го намали американскиот воен ангажман дури и без конечен одлучувачки удар.
Генералниот директор на МААЕ, Рафаел Гроси, го информираше Советот за безбедност на ОН дека не се забележани активности за обнова на оштетените постројки, но нагласи дека инспекторите немаат пристап до објектите за да потврдат дали има пренасочување на нуклеарен материјал. Од своја страна, Техеран предупреди дека на секоја воена акција ќе одговори со удари врз цивилни и економски објекти, користејќи ги своите преостанати арсенали од балистички ракети за кои израелските власти проценуваат дека се складирани и засилени во текот на затишјето.