Голем пожар што избувна на дивата депонија Вардариште попладнево предизвика сериозни прекини во снабдувањето со електрична енергија во повеќе делови од Скопје. Без струја останаа Аеродром, Ново Лисиче, дел од Центар, како и Ченто, индустриската зона, Кванташки пазар, Арачиново, Стајковци, Трубарево и Бунарџик. Исклучувањето на далекуводите било направено поради безбедносни причини.
Од Центарот за управување со кризи соопштија дека пожарот зафатил голем дел од депонијата, а постои можност да биле опфатени и постари објекти. Директорот Мухамед Али информира дека на терен интервенираат 13 пожарникари со пет возила.
„Поради обемот на пожарот и опасноста да се прошири надвор од депонијата како помош на Протипожарната бригада на Скопје се испратени еден БТР, еден хермелин и еден тим на ДЗС“, изјави директорот на Дирекцијата за заштита и спасување Стојанче Ангелов. Тој додаде дека постојат сомневања оти пожарот можеби бил подметнат.
Од Електродистрибуција попладнево соопштија дека дефектот се наоѓа во 110 киловолтната трафостаница „Аеродром“. Според компанијата, тоа е причината што дел од корисниците во Аеродром и Ново Лисиче, како и во централното градско подрачје, останале без електрична енергија. Од таму нагласуваат дека нивните екипи веќе работат на санација на дефектот.