Обилните врнежи од ноќеска предизвикаа сериозни проблеми во источниот дел на земјата, каде Кочанска Река излезе од коритото и ги поплави селата Чешиново, Облешево и Чифлик. Најтешките последици се во Облешево, каде под вода завршија куќи, земјоделски површини и магацини со ориз.
Поради состојбата, Општина Чешиново–Облешево активираше кризен штаб. Градоначалникот Јорданчо Костадинов изјави дека екипите работат на терен, но дека е неопходна дополнителна механизација за да се справат со последиците.
Директорот на Центарот за управување со кризи, Мухамед Али, потврди дека утринава поплавени се повеќе објекти и дворови на различни локации во општината.
„Локалната самоуправа е активно ангажирана на терен со сите расположливи ресурси. Во интервенциите учествуваат и ТППЕ Кочани, Водостопанство ‘Брегалница’ и РЦУК Кочани. Побарана е и дополнителна материјално-техничка поддршка, особено за испумпување вода од поплавените објекти“, вели директорот на ЦУК.
Според него, водостојот на Брегалница и Кочанска Река е значително зголемен, а излевање е регистрирано и на територијата на Општина Штип.
„Како последица на врнежите, утрово се појавија свлечишта на експресниот пат Радовиш–Штип и на патниот правец Злетово–брана Кнежево. За настаните веднаш беше информирано ЈП Македонија пат, чии екипи излегоа на терен и интервенираа соодветно“, изјави Али.
Дополнително, регистрирано е лизгање на земјиште и во село Липково, кај местото викано Кисела Вода. Општината Липково соопштила дека нема доволно ресурси за интервенција и побарала помош од државните институции за стабилизирање на свлечиштето.