Во Собранието на Република Македонија денеска се одржува редовниот состанок на Постојаниот комитет на Парламентарното собрание на НАТО, форум што обединува шефови и заменик-шефови на парламентарните делегации од сите земји членки на Алијансата.
На отворањето на состанокот ќе се обратат премиерот Христијан Мицкоски и министерот за одбрана Владо Мисајловски. Тие ќе ги пренесат ставовите на државното раководство за улогата на Македонија во НАТО, безбедносните предизвици и парламентарната соработка во рамки на Алијансата.
Во работата активно учествува и Делегацијата на Собранието на Република Македонија, предводена од Драган Ковачки како шеф, и Антонијо Милошоски како заменик-шеф.
Оваа сесија на Постојаниот комитет е дел од редовниот годишен календар на телото, кое има задача да обезбеди парламентарна поддршка за стратешките насоки на Алијансата.
Парламентарното собрание на НАТО е платформа за парламентарна дипломатија која ја зајакнува врската меѓу националните парламенти и НАТО. Неговата мисија е да обезбеди транспарентност на политиките, да поттикне трансатлантска солидарност и да овозможи пошироко вклучување во клучните безбедносни прашања.
Собранието брои 281 делегат од 32 земји членки, како и парламентарци од асоцијативни земји, регионални партнери, медитерански членки, како и набљудувачи од Европскиот парламент и други парламентарни тела.
Извор: Република