ПОТВРДЕНА САЛМОНЕЛА ВО ШТИП: 17 ученици и вработени со симптоми на труење од сендвичарница

Салмонела изолирана кај дел од заболените, сендвичарницата останува затворена

По случајот со труење на храна од сендвичарница во Штип, бројот на заболени ученици и вработени од едно средно училиште се зголеми на 17 лица.

Од Центарот за јавно здравје – Штип информираат дека кај дел од заболените е изолирана бактеријата Salmonella enteritidis.

Епидемиологот Светлана Живкова изјави:

„До сега се регистрирани 17 случаи, кај дел од нив од измет е изолирана Salmonella enteritidis. Земени се 35 примероци од храна, вработени и работни површини и се пратени во лабораторија на Институтот за јавно здравје во Скопје“.

Таа додаде дека резултатите од земените примероци сè уште се очекуваат.

Претходно беше објавено дека сендвичарницата е затворена, а од објектот се земени примероци од храната и работните површини. Извршен е и санитарен преглед на сите вработени, кои дополнително добиле и едукација.

Мајка на едно од децата што заврши на Инфективното одделение во Клиничка болница – Штип изјави дека симптомите на труење се појавиле по консумирање на сендвич со пилешки стек и пржени компири.

Агенцијата за храна и ветеринарство спроведе инспекциски надзор. Објектот останува затворен додека не пристигнат резултатите од лабораториските анализи.