Погребната церемонија за папата Франциск
Денеска на плоштадот Свети Петар во Ватикан се одржува погребната церемонија за папата Франциск, кој почина во понеделникот на 88-годишна возраст. Погребната миса започна утрово во 10 часот по локално време, а по завршувањето, папата ќе биде погребан во базиликата Света Марија Велика.
Церемонијата ја следат повеќе од 200.000 верници од целиот свет. Присуствуваат и околу 50 шефови на држави, меѓу кои американскиот претседател Доналд Трамп, како и 10 владејачки монарси, лидери од Италија, Франција, Германија, Велика Британија, Украина, Бразил, од институциите на Европската Унија, како и претставници од родната земја на папата – Аргентина.
Како тече церемонијата?
Ковчегот на папата Франциск беше запечатен во петокот навечер на приватна церемонија водена од осум кардинали. Лицето му беше покриено со бел свилен вел, а телото беше благословено со света вода. Во ковчегот беа поставени папски предмети: ковани пари, медали и посебен документ што ги бележи клучните моменти од неговото 12-годишно понтификатство.
Франциск, познат по својата скромност, побарал да биде погребан во едноставен дрвен ковчег обложен со цинк, за разлика од традицијата на троен ковчег кај неговите претходници.
Детали за мисата
Мисата ја предводи италијанскиот кардинал Џовани Батиста Ре, а сослужуваат 220 кардинали, 750 епископи и свештеници, како и повеќе од 4.000 свештени лица присутни на плоштадот.
Погребот се одвива во атмосфера на тишина, молитва и длабока тага, обединувајќи го светот во последно простување на еден од најомилените духовни водачи на современиот век.
Извор: Рацин