Бугарија повеќе нема да испраќа оружје и муниција во Украина од своите воени залихи, ниту пак има доволно пари за да обезбеди финансиска помош на Киев. Ваквиот став го соопшти бугарскиот премиер Румен Радев на неформалниот самит на Европската унија во Даблин.
Радев образложи дека државата е во процес со Европската унија поради прекумерен буџетски дефицит, што значително ги ограничува нејзините финансиски можности. Сепак, тој нагласи дека Софија нема да ги спречува другите земји членки самостојно да му помагаат на Киев.
Тој подвлече дека дава поддршка на дипломатско решение за војната, но остро се спротивставува на натамошното испраќање воена опрема, оценувајќи дека тоа предизвикува нови жртви, разурнувања и натамошна ескалација на воениот конфликт.
Софија останува отворена за хуманитарна помош, обнова на оштетениот електроенергетски систем и здравствена заштита, но нема да финансира воени набавки. Доколку учествува како гарант за европските заеми, земјата ќе бара средствата делумно да се определат за бугарската заедница во Одеската област.
Ваквиот потег претставува јасен пресврт во стратегијата на Софија кон украинската криза. На 21 октомври беше сопрено финансирањето преку Европскиот инструмент за мировна помош, претходно беа стопирани директните испораки на оружје, а државата целосно се повлече од Коалицијата на волјата предводена од Обединетото Кралство и Франција.
Бугарија се приклучува на групата членки што одбиваат нови финансиски обврски за украинските потреби. Унгарија, Словачка и Чешка претходно одбија учество во заедничкиот европски заем од 90 милијарди евра наменет за годините 2026 и 2027.
Пристапот на овие држави сепак се разликува во деталите. Додека Унгарија континуирано одбива воен ангажман, Словачка ги запре само државните пакети на вооружување, дозволувајќи комерцијална трговија.
Чешка е ослободена од заемните европски обврски, но и натаму директно учествува во набавките на воена артилериска муниција за украинската армија.