Собранието денеска ја одржува првата пленарна седница по локалните избори
Собранието денеска ќе ја одржи првата пленарна седница по завршувањето на Локалните избори. Пред формалниот почеток на 70. седница, премиерот и министрите во траење од два часа ќе одговараат на прашања поставени од опозициските пратеници.
Богата агенда на 70. седница
На дневниот ред се наоѓаат верификацијата на мандати на нови пратеници, избори на членови во Фискалниот совет и Националниот совет за високо образование и научно-истражувачка дејност, како и избор на член на Државниот совет за превенција на детско престапништво и правда за децата. На седницата ќе се разгледуваат и два предлога за ратификација – Спогодбата со Азербејџан за визно ослободување за дипломатски и службени пасоши и измените на Конвенцијата за заедничка транзитна постапка.
Законски измени во прво читање и продолжение на 19. седница
Во прво читање ќе се најдат измените на законите за правата на заедниците под 20 проценти, аудиовизуелни медиумски услуги, ДДВ, гранична контрола и предлог-законот што предвидува претворање на државните побарувања во траен влог во Јавното претпријатие за стопанисување со спортски објекти во Скопје. По завршувањето на 70. седница, Собранието ќе продолжи со преостанатите точки од 19. седница, меѓу кои Финансискиот план на Агенцијата за супервизија на капитално финансирано пензиско осигурување за 2025 година и одлуката за висината на месечниот надомест што Агенцијата го наплаќа од пензиските друштва.