Скопското Основно јавно обвинителство донесе наредба за спроведување истражна постапка против вработен во Дирекцијата за заштита и спасување (ДЗС). Осомничениот работел во Одделението за издавање урбанистички согласности, а истрагата е отворена поради основано сомневање дека сторил кривично дело примање поткуп.

„Осомничениот, како вработен во ДЗС бил овластен да потпишува, дава мислење и издава согласност на просторни и урбанистички планови и проекти од аспект на заштитата и спасувањето и елаборати за заштита од пожари, експлозии и опасни материи, но за да даде согласност за елаборат кој не ги исполнувал условите за градба во делот за заштита од пожари, експлозии и опасни материи, побарал и примил поткуп од едно лице во износ од 32.000 денари“, соопшти Обвинителството.

Надлежниот јавен обвинител проценил дека во конкретниот случај постои реален ризик осомничениот да се даде во бегство, да го повтори делото или пак да влијае врз сведоците во постапката. Поради овие околности, до судијата на претходна постапка е доставен официјален предлог за определување мерка притвор.