Рускиот претседател Владимир Путин денеска потпиша указ за објавување на одмазднички економски мерки како одговор на „непријателските акции“ на западните држави и меѓународни организации, се вели во документот објавен на официјалната веб-страница.
Указот на Путин забранува правење трансакции и исполнување обврски кон странски физички и правни лица кои се под санкциите, како што се трговија и извоз на производи и ресурси, без да се прецизира кои поединци или субјекти може да бидат засегнати од мерките.
На руските државни органи, организации и поединци им е забрането „да вршат трансакции (вклучувајќи склучување договори за надворешна трговија) со правни, физички лица и организации под нивна контрола, во однос на кои се применуваат посебни економски мерки; да вршат со лица под санкции, обврски според извршените трансакции (вклучувајќи ги и склучените договори за надворешна трговија), доколку таквите обврски не се целосно исполнети“, се вели во документот.
Според декретот, тоа се неопходни мерки за заштита на националните интереси на Русија „во врска со непријателските дејствија на Соединетите Американски Држави и странските држави и меѓународните организации кои им се приклучија, кои се во спротивност со меѓународното право и имаат за цел незаконско ограничување или лишување на Руската Федерација, граѓаните на Руската Федерација и руските правни лица од правото на сопственост“.
Во уредбата се вели дека е во сила додека не се откажат економските мерки на западните земји, објави Си-Ен-Ен.