Рускиот претседател Владимир Путин денеска изјави дека просечната годишна температура на воздухот во Русија расте два и пол пати побрзо отколку во светот.
На самитот на Г-20, на кој тој учествуваше преку видео врска, рече дека температурата на воздухот во Русија во последните десет години се зголемила за повеќе од половина степен, пренесе ТАСС.
Путин истакна дека прашањето за климатските промени е од големо значење, нагласувајќи дека Русија ги чувствува последиците од глобалното затоплување.
– Се соочуваме и со опустинување и со ерозија на почвата. Особено сме загрижени поради топењето на вечниот мраз, кој сочинува значителен дел од нашата територија, рече рускиот претседател.
Тој потсети дека Русија активно учествува во меѓународните напори за зачувување на климата, пренесува Бета.
– Конкретно, Русија ги почитува сите свои обврски од рамковната конвенција на ОН за климатски промени и Парискиот договор и постојано ја следи политиката на намалување на емисиите на стакленички гасови, преземајќи чекори за подигање на енергетската ефикасност на својата економија и намалување на емисиите од екстракција на нафта, појасни Путин.