Поранешниот бугарски претседател Румен Радев денес, 2 март, ја регистрираше коалицијата „Прогресивна Бугарија“ во Централната изборна комисија за учество на предвремените парламентарни избори на 19 април. Со ова Радев влегува во изборната трка само неколку недели по повлекувањето од претседателската функција.
Според бугарските медиуми, Радев соопштил дека коалицијата е внесена во ЦИК за изборите на 19 април, а уште во февруари најави дека нема да настапи со сопствена партија затоа што нема доволно време за нејзина регистрација. Медиумите објавија и дека на самата регистрација не биле поканети новинари.
Коалицијата ја сочинуваат три формации: Движење „Нашиот народ“, Социјалдемократската партија и движењето „Социјалдемократи“. Со ова Радев формално влегува во директна парламентарна пресметка во период кога бугарската политика повторно влегува во изборен циклус со висока неизвесност.
Новото позиционирање на Радев следува по уште една владина криза во Бугарија. Дел од медиумите потсетуваат дека изборите на 19 април се распишани по падот на владата во декември 2025 година, по протести поврзани со даночни зголемувања, корупција и недоверба во институциите.