Студија ги истакнува клучните граници и родителските препораки

Мобилните телефони стануваат дел од секојдневието на децата, но времето кога тие треба да добијат сопствен уред сè уште предизвикува дилеми. Иако технологијата овозможува комуникација, учење и чувство на сигурност, стручњаците предупредуваат на потенцијални ризици за менталното и физичкото здравје.

Нова обемна студија, предводена од детскиот и адолесцентен психијатар Ran Barzilay, анализирала податоци од над 10.500 деца и ја испитала поврзаноста меѓу возраста на првиот смартфон и здравствената состојба на 12-годишна возраст.

Возраст од 12 години како клучен фактор

Истражувањето покажало дека децата кои добиле телефон пред 12 години имаат поголема веројатност за симптоми на депресија, нарушен сон и зголемена телесна тежина во споредба со врсниците кои се уште не користеле сопствен уред.

Експертите потенцираат дека станува збор за статистичка поврзаност, што значи дека раното користење не предизвикува автоматски проблеми, но го зголемува просечниот ризик.

Не се важни само годините

Ризикот зависи и од интензитетот и начинот на користење. Децата кои поминуваат многу време на телефонот, особено во доцните ноќни часови, и без родителски надзор, почесто имаат нарушен сон. Неквалитетниот сон влијае на концентрацијата, училишниот успех и расположението.

Препораки за родителите

Стручната јавност советува постепено воведување на телефонот со јасни правила:

  • телефонот да не се носи во кревет;

  • да се полни надвор од спалната соба;

  • да постојат временски ограничувања;

  • редовен разговор за дигитална безбедност и одговорност.

Периодот меѓу 12 и 13 години се смета за соодветен за воведување на сопствен телефон, бидејќи децата сè уште се отворени за насоки и родителска контрола.

Заклучокот е дека проблемот не е самиот телефон, туку раното и неконтролирано користење. Во дигиталната средина која станува дел од детството, клучно е како, кога и под кои услови детето ќе користи мобилен уред.