Нов пристап во дијагностиката на рак
Научници од Европската лабораторија за молекуларна биологија (ЕМБЛ) во Хајделберг, Германија, развија метод кој овозможува рано откривање на абнормални клетки што можат да доведат до тумори. Новиот систем, наречен „МАГИК“ (Машинско учење – асистирана геномика и конвергенција на слики), комбинира ласерски ознаки со напредни алгоритми на вештачка интелигенција (ВИ).
Главниот автор, Јан Корбел, објасни дека хромозомските абнормалности се тесно поврзани со агресивни тумори, метастази, отпорност на терапија и брз раст на туморот.
„Иако е познато дека овие абнормалности можат да предизвикаат рак, досега беше речиси невозможно да се идентификуваат ранливите клетки“, рече Корбел.
Како функционира системот „МАГИК“
Системот ги испитува клетките со фокус на структури наречени микронуклеуси, делови од ДНК одвоени од јадрото. Клетките со микронуклеуси се посклони на создавање нови хромозомски абнормалности, што ги прави потенцијално канцерогени. „МАГИК“ може да испита до 100.000 клетки, откривајќи дека нешто повеќе од 10 отсто од клеточните делби предизвикуваат спонтани абнормалности.
Откако абнормалните клетки ќе се идентификуваат, ласер ги обележува со флуоресцентна молекула, по што тие се одделуваат и понатаму се анализираат. Според Марк Козенц, автор на трудот објавен во списанието Nature, овој пристап отвора нови можности за разбирање на потеклото на туморите и потенцијално рано интервенционирање.
Перспектива за иднината
Новата технологија нуди можност за брзо и точно откривање на опасни клетки кои се тешко забележливи со конвенционалните микроскопи. Истражувачите се надеваат дека со комбинација на ВИ и ласерско обележување, системот ќе помогне во развој на поефикасни методи за превенција и третман на канцерогените процеси.