Во тек се и последните работи на хируршкиот оперативен блок, со нови сали во две фази
Реконструкцијата на КАРИЛ се наоѓа на самиот крај, а од Министерството за здравство очекуваат просторот многу скоро повторно да им биде достапен на пациентите. Министерот Азир Алиу по посетата на Клиниката за ТОАРИЛУЦ соопшти дека во истовреме се финализира и обновата на хируршкиот оперативен блок.
„Се финализира и реновирањето на хируршкиот оперативен блок, каде се опфатени четири операциони сали во прва фаза. Во втора фаза е предвидена и нова операциона сала во рамки на Ургентниот центар, со што оваа Клиника ќе добие уште една сала за помали интервенции“, истакна министерот Азир Алиу по денешната обиколка.
При средбата со директорот на Клиниката, д-р Игор Мерџаноски, биле разгледани и опциите за набавка на нова современа медицинска опрема за КАРИЛ и за оперативниот блок. Фокусот е насочен кон подобрување на условите во кои се лекуваат пациентите и зголемување на квалитетот на третманот.