Американскиот државен секретар Марко Рубио изјави дека Вашингтон нема да дозволи Русија да стане целосно зависна од Кина, потенцирајќи дека тоа би било проблем за САД, особено во областа на нуклеарната безбедност.

Во интервју за Breitbart News, Рубио објасни дека, без разлика дали Москва сака да ги подобри односите со Вашингтон, таа нема да може да го стори тоа доколку стане целосно зависна од Пекинг.

  • За нас е подобро да имаме односи со Русија, изјави Рубио, нагласувајќи дека САД сакаат да спречат понатамошно приближување меѓу Русија и Кина, но без да создадат конфронтација меѓу две нуклеарни суперсили.

Ризик од сојуз меѓу Москва и Пекинг

Според Рубио, постои можност Русија да стане „постојан помлад партнер“ на Кина, што би можело да доведе до цврст сојуз меѓу две нуклеарни сили спротивставени на САД.

  • Не знам дали некогаш целосно ќе успееме да ја одделиме Русија од Кинезите, но ако нивната соработка остане цврста, тоа нема да биде добро за глобалната стабилност, оцени американскиот државен секретар.

Тој предупреди дека потесните врски меѓу Кина и Русија можат да станат долгорочен предизвик за Вашингтон, бидејќи стратешката зависност на Москва од Пекинг би значела послаба позиција на САД на глобалната сцена.

„Никсон наопаку“ – новата стратегија на САД?

Политиката на администрацијата на Трамп кон Русија предизвика реакции во Кина, каде што експертите стравуваат дека Вашингтон ја применува стратегијата „Никсон наопаку“, изјави Джа Јан Чон, доцент по политички науки на Националниот универзитет во Сингапур, за Фајненшл тајмс.

Оваа стратегија се реферира на одлуката на Ричард Никсон од 1970-тите, кога САД ги подобрија односите со Кина со цел да го изолираат Советскиот Сојуз. Но, овој пат, целта е да се ослаби Кина преку нејзино раздвојување од Русија.

Скептицизам околу успехот на стратегијата

Поранешниот виш директор за Русија во Советот за национална безбедност на САД, Томас Грем, изрази скептицизам дека политиката на Трамп ќе успее да ја поткопа стратегијата на Москва за зајакнување на партнерството со Пекинг.

  • –Си Џинпинг и Путин постојано разговараат. Тие се најдобри пријатели. Идејата дека ако им ја дадеме Украина на Русите и сè друго што тие сакаат во Европа, тие ќе прекинат со Кина – е чиста заблуда, изјави Грем.

Според него, Москва има долгорочни планови за продлабочување на односите со Пекинг, а стратегијата на САД би можела да има ограничен ефект врз нивното партнерство.