Конфликтот меѓу САД и Иран сѐ повеќе се пренасочува кон контролата на Ормускиот теснец — еден од најважните енергетски и поморски коридори во светот, оценува Sky News во своја анализа.
Според дописничката од Дубаи, Сали Локвуд, САД веќе концентрираат значајни поморски сили во близина на овој стратешки пловен правец, што дополнително ја зголемува напнатоста во регионот.
Во вакви услови, комуникацијата со американската морнарица станува клучна, бидејќи ситуацијата се оценува како исклучително чувствителна. Иако формално сѐ уште е во сила кревко примирје, секој потег на теренот може лесно да ја наруши рамнотежата.
Анализата предупредува дека евентуална блокада од страна на САД би можела целосно да го урне примирјето и да доведе до нова ескалација на конфликтот.