Зголемена потрошувачка на муниција поради конфликтот
Американското Министерство за одбрана најави забрзано зголемување на производството на ракети и клучна воена опрема, поради интензивната потрошувачка на муниција во конфликтот на Блискиот Исток. Пентагон посочува дека одбранбената индустрија веќе се префрла на режим што го опишува како „воена основа“.
Причината за ваквата одлука е зголемената употреба на пресретнувачки ракети од страна на САД, Израел и земјите од Заливот, особено за време на иранските одмазднички напади. Ова отвори прашања за расположливите залихи на ова скапо оружје.
Зголемување на производството на THAAD и PrSM
Пентагон соопшти дека ќе го зголеми четирикратно производството на клучната компонента за системот за противракетна одбрана THAAD, кој важи за еден од најнапредните системи во светот и во последните недели интензивно се користи во регионот.
Договорите се склучени со компаниите Lockheed Martin и BAE Systems, а се однесуваат на главите за наведување ракети. Уште на крајот на јануари, Lockheed Martin најави дека ќе го зголеми производството на THAAD од околу 100 на приближно 400 системи годишно во наредните години.
Дополнително, Министерството објави договор со истиот производител за забрзување на производството на PrSM, тактичка балистичка ракета која првпат е употребена во конфликтот со Иран и е наследник на ATACMS.
Нови договори и зголемени воени резерви
Според соопштението на Пентагон, договорот „ја става одбранбената индустрија на воена основа“ и овозможува „градење арсенал на слобода“. Производството на PrSM ќе се зголеми четирикратно, што го потврди и Lockheed Martin во посебна изјава.
Воедно, Вашингтон склучи и трет договор со Honeywell Aerospace за зголемување на производството на критични компоненти за американските резерви на муниција, вклучително и електронски системи.