Секретарка за еднакви можности на ДУИ, Саранда Имери Стафаи во нејзиниот говор за време на денешниот митинг на Огнената група во Чаир упати силни критики кон новоформираната влада за која рече дека не е „Фронт за Европа“ како што ја нарекуваат тие кои ја кроеја, туку е фронт за ул.„Бриселска“ во Тафталиџе и фронт за спас на Артан Груби, кој според нејзе треба да даде отчет не само за нереализирањето на програмата туку и за тоа кај завршиле скриените хонорари од неговото министерство.
„Нема ништо европско во оваа влада и во овој нов владин кабинет, можеме да каѓеме дека не е „Фронт за Европа“ туку е фронт за улицата Бриселска и за Тафталиџе. Ова е фронт за спас на првиот вицепремиер кој не само што треба да даде отчет пред нашите граѓани за нереализирање на нашата партиска програма со која ние победивме на изборите во 2020 година, туку овојпат на неговите плеќи има и нешто друго. Тој треба да даде отчет за последните два скандали кои излегоа на негово име. Јас денеска од оваа говорница вечерва барам да ми одговори. За што и каде отидоа парите, 60 илјади евра платени скришни хонорари од министерството кој тој го води?“, истакна Имери Стафаи и додаде:
„Јас мислам дека сите го знаеме одговорот. Наместо тие пари да се инвестираат во училишта и градинки во албанските населби, тие пари одат за да ги плаќа неговите војници од порталите кои деноноќно клеветат. Затоа почитувани граѓани на Чаир, колку побрзо замине оваа извршна власт, толку подобро ќе биде за ДУИ“.