Американскиот претседател Доналд Трамп денеска јавно ја навреди новинарката на Си-Ен-Ен, Кејтлин Колинс, откако таа му постави прашање за зголемените трошоци за изградба на новата балска сала во Белата куќа.
Реакцијата на Трамп уследи преку неговата социјална мрежа Truth Social, каде што ја нарече Колинс „глупава и одвратна“, тврдејќи дека цената е повисока затоа што објектот ќе биде двојно поголем од првично планираното и со значително подобар ентериер.
„Кејтлин Колинс од Си-Ен-Ен, секогаш глупава и одвратна, ме праша зошто новата балска сала чини повеќе отколку што беше проценето пред една година. Ѝ одговорив дека ќе биде двојно поголема, а квалитетот на изработка е подигнат на највисоко ниво“, напиша Трамп.
Тој додаде дека проектот е изграден под буџет и пред рок, нагласувајќи дека целосно е финансиран со приватни донации, без користење средства од даночните обврзници.
„Интересно е што ретко се пишува за тоа дека не е потрошен ниту еден долар од парите на граѓаните“, истакна Трамп.
Во истата објава, американскиот претседател повторно го нападна и Си-Ен-Ен, нарекувајќи го медиумот „лажни вести“ и „корумпирана операција“, додавајќи дека телевизијата има толку ниска гледаност што повеќе не е релевантна.
Ова е уште еден во низата вербални напади на Трамп врз новинари. Минатата недела тој навреди американска новинарка откако таа постави прашање за безбедносните проверки на авганистанските бегалци, прашувајќи ја: „Дали си ти глупава личност?“, за време на настап во Мар-а-Лаго, објави New York Post.
Претходно, Трамп го нападна и New York Times по текст за неговата возраст и замор, нарекувајќи ја авторката „новинарка од втора класа која е грда и однатре и однадвор“. На почетокот на ноември, тој навреди и новинарка на Bloomberg, нарекувајќи ја „свиња“, додека друга ја опиша како „ужасна личност“.