Почнува јавниот увид во Избирачкиот список
Во пресрет на локалните избори закажани за 19 октомври, од сабота започнува јавниот увид во Избирачкиот список. Увидот ќе трае 20 дена, односно до 11 септември на полноќ, по што заклучениот список ќе биде потпишан од Државната изборна комисија (ДИК) најдоцна до 3 октомври, пренесува 360 степени.
Рокови и постапки за граѓаните и партиите
Секој граѓанин ќе има можност да ги провери своите податоци и да поднесе барање за запишување, дополнување или бришење на информации во периодот од 23 август до 11 септември. Барањата се поднесуваат писмено во подрачните одделенија и месните канцеларии на ДИК, како и по електронска пошта, со задолжително приложување на потребните докази. Лицата во притвор и затвор, исто така, можат да извршат увид преку надлежните органи за извршување на санкциите.
И политичките партии имаат рок до 11 септември да поднесат барање за добивање на Избирачкиот список. По приемот на списокот, кој треба да биде најдоцна до 14 септември, тие имаат пет дена за евентуални барања за промени. ДИК е должна да решава во рок од три дена, а против нејзината одлука може да се поднесе тужба до Управниот суд, кој мора да одлучи во рок од 24 часа.
Конечен список и обврски на институциите
ДИК е должна да одлучи по барањата на граѓаните во рок од 24 часа, а доколку истите бидат одбиени, Управниот суд е должен во наредните 24 часа да донесе одлука. Министерството за внатрешни работи, еден ден по завршувањето на увидот, ќе достави списоци на лица кои побарале нова лична карта, како и на оние кои ќе наполнат 18 години до денот на изборите. Податоци ќе пристигнат и од други институции – судовите, органите за извршување санкции и Министерството за социјална политика – за ажурирање на списокот. Конечниот Избирачки список ќе биде заклучен најдоцна на 26 септември, а потпишан на 3 октомври.