Најмногу посетители од Велика Британија, Франција и Германија
Шпанија во мај годинава забележа историски резултат во туризмот, откако земјата ја посетиле повеќе од 10 милиони странски туристи, а нивната потрошувачка достигнала рекордни 13,5 милијарди евра.
Според податоците на Шпанскиот национален институт за статистика (ИНЕ), во текот на мај пристигнале околу 10,3 милиони странски туристи, што претставува раст од 9,5 проценти во споредба со истиот месец лани и највисока мајска посетеност досега.
Најголем број гости пристигнале од Велика Британија – речиси 2,2 милиони, што е зголемување од 6,1 процент. Следуваат Франција со околу 1,3 милиони туристи и раст од 11,1 процент, како и Германија со приближно 1,3 милиони посетители, односно девет проценти повеќе во споредба со минатата година.
Каталонија останува најпосетен регион
Најголем дел од туристите, околу 5,4 милиони, во Шпанија престојувале меѓу четири и седум ноќевања, што е за 14,1 процент повеќе отколку во мај минатата година.
Бројот на еднодневни посети се зголемил за 2,7 проценти, додека бројот на туристи кои останале повеќе од 15 ноќевања е намален за 3,7 проценти.
Каталонија била најпосетената автономна заедница со учество од 21,1 процент во вкупниот број странски туристи, пред Балеарските Острови со 20,6 проценти и Андалузија со 15,9 проценти.
Над 50 милијарди евра потрошени за пет месеци
Од почетокот на годината до крајот на мај, Шпанија ја посетиле повеќе од 36,8 милиони странски туристи, што е за пет проценти повеќе во споредба со истиот период лани.
Во мај, меѓународните туристи потрошиле рекордни 13,5 милијарди евра, што претставува раст од 10,9 проценти на годишно ниво. Просечната дневна потрошувачка достигнала 214 евра, додека просечната потрошувачка по турист изнесувала 1.321 евро, што е за 1,2 проценти повеќе од мај 2025 година.
Во првите пет месеци од годинава, вкупната потрошувачка на странските туристи во Шпанија достигнала 50,26 милијарди евра, што е зголемување од 7,8 проценти во однос на истиот период минатата година.