Троен демографски притисок го намалува бројот на работоспособни
На Светскиот самит на владите во Дубаи, претседателката Гордана Сиљановска-Давкова денеска изнесе алармантни проекции за демографската ситуација во Македонија. Таа посочи дека земјата денес брои 1,8 милиони жители, но според проекциите, до 2070 година населението може да се намали на 1,2 милиони, што претставува загуба од 33 отсто.
Сиљановска-Давкова истакна дека Македонија се соочува со троен демографски притисок: ниска стапка на наталитет, висока емиграција и забрзано стареење на населението. Овие трендови директно го намалуваат бројот на работоспособни граѓани и го зголемуваат товарот врз здравствениот, социјалниот и пензискиот систем, што е особено тежок предизвик за мала и отворена економија.
Реформи, младите и дијаспората како двигатели на развојот
Претседателката повика на длабоки институционални реформи со акцент на судството, јавната администрација и забрзана дигитализација на јавните услуги, кои треба да ја зголемат ефикасноста и довербата во институциите.
Таа ја потенцираше улогата на младите како двигатели на дигиталната и економската трансформација и активни учесници во креирањето на јавните политики. Исто така, ја истакна важноста на дијаспората како извор на интелект, иновации и инвестиции, кој треба системски да биде вклучен во развојните процеси на државата.
Повик за демографски отпорно општество
На крајот, Сиљановска-Давкова повика на изградба на демографски отпорно општество – општество во кое луѓето ќе имаат причини да останат, да живеат и да формираат семејства. Таа нагласи дека демографијата не е само статистика, туку прашање за иднината на државата.