Во Кочани денеска се одржа протестен марш под името „Марш за ангелите“. Oрганизиран e од семејствата на младите кои трагично загинаа во пожарот во дискотеката „Пулс“. Илјадници граѓани се приклучија на мирниот протест. Тој започна во Паркот на Револуцијата во точно 12:05 часот – време што симболизира задоцнетата реакција на институциите.
Протестниот марш минуваше пред клучните институции во градот
Маршот продолжи низ центарот на Кочани, со граѓани кои минуваа пред Трговскиот центар, Општината, Полициската станица, Основниот суд и Обвинителството. Пред секоја институција, учесниците се задржаа и поставија јавно прашања за одговорноста на надлежните органи.
— „Кој ги уби нашите ангели, кој ги пеплоса тие ангелски лица?“ – запраша гласно една од мајките на загинатите, предизвикувајќи силни емоции кај присутните.
Повик за правда и институционална одговорност
Присутните остро реагираа на, како што велат, системски пропусти кои довеле до трагедијата. Беше истакнато дека ако институциите навремено и совесно ги извршувале своите должности, трагичниот настан можел да биде спречен.
Протестот заврши на местото каде што започна, но учесниците порачаа дека не станува збор за последна акција – туку за почеток на нивната борба за правда.
Јасна порака од организаторите за целта на протестот
Во писменото известување испратено пред маршот, организаторите потенцираа дека настанот не е насочен против вработените од обезбедувањето на дискотеката, туку е повик до институциите за преземање одговорност. Побарано е граѓаните кои не се согласуваат со оваа порака, да не се приклучуваат на маршот.
Извор : Курир