Голем град удри по покривите, улиците и возилата – улиците за неколку минути побелеа
Попладнево, нешто по 16 часот, силно невреме со интензивен град ја зафати територијата на Охрид и неговата околина. На социјалните мрежи веднаш се појавија снимки и фотографии од граѓани, на кои се гледаат густи и темни облаци над градот, проследени со поројни врнежи и крупен град со големина на орев.
„Се стемни за неколку минути, почна да дува силен ветер, а потоа небото се отвори. Градот беше толку силен што за кратко целата улица беше бела“, напиша еден охриѓанец на Фејсбук, споделувајќи фотографии на кои се гледаат возила покриени со мраз.
УХМР: Невремето е резултат на силна конвективна облачност над западниот регион
Според податоците од Управата за хидрометеоролошки работи (УХМР), денешното невреме било резултат на интензивна конвективна облачност која се формирала над западниот дел на Македонија. Оваа формација на облаци придонела за нагло влошување на времето и за појава на локализирана невреме со електрични празнења, силни врнежи и град.
Метеоролозите предупредуваат дека ваквите услови би можеле да продолжат и утре. Според нив, и во наредните 24 часа се очекува нестабилно време, со засилена можност за локални поројни врнежи, ветер и појава на град, особено во попладневните часови.
ЦУК апелира на внимателност и следење на препораките
Од Центарот за управување со кризи (ЦУК) упатија апел до граѓаните да бидат внимателни и подготвени за нови промени на времето. Институцијата препорачува на граѓаните во погодените региони да не се изложуваат непотребно надвор и да ги следат насоките на надлежните служби.
Поради силниот удар на градот и брзото влошување на временските услови, ЦУК ги повика граѓаните да пријавуваат евентуални штети и опасности преку дежурните линии на институциите.