Претстојните локални избори, според министерот за локална самоуправа Златко Перински, не би требало да се соочат со сериозни проблеми. Тој посочи дека евентуални потешкотии со цензусот може да се појават само во една или две општини, но дека Државната изборна комисија располага со механизми за гарантирање на регуларноста на процесот.

„Како што ќе се ближиме до датумот на локалните избори се повеќе ќе се заоструваат реториките, но ако имаме успешно оценет и спроведен изборен процес не би требало да има аргументи од ниту една политичка номенклатура да не ги прифати резултатите. Сите анкети досега покажуваат убедливо водство на ВМРО-ДПМНЕ и постојат шанси да добие градоначалник во речиси секој град,“ изјави Перински во гостувањето во Дневникот на ТВ Сител.

Осврнувајќи се на прашањето дали жали што не е кандидат на ВМРО-ДПМНЕ за градоначалник на Скопје, тој нагласи дека останува дел од Владата и дека е задоволен со изборот на Орце Ѓорѓиевски.

„Навистина ми е драго што ВМРО-ДПМНЕ има многу квалитетен кандидат, Орце Ѓорѓиевски, кој е докажан и искусен во рамки на својата општина и ќе има голем исчекор во водењето на градот,“ рече Перински.

Министерот додаде дека на овие избори очекува „повеќе политички фолклор отколку што сме навикнати досега,“ но не и компликации во изборниот процес.

„Сметам дека е добро и политичките партии и независните граѓански организации да се натпреваруваат на изборите. Јас сум секогаш отворен за комуникација со нив. Во суштина тие тоа го бараа – да нема долен праг, и тоа го добија,“ изјави тој.

Во однос на дилемите за можноста изборите да се оспорат пред Управниот суд поради законска празнина, Перински истакна дека повереници се назначуваат само во случаи на неуспешен процес и непостигнат цензус.

„Тоа сметам дека за демократијата е лошо… но не гледам причина зошто би дошло до тоа, кога сите политички субјекти и голем број граѓански организации веќе пријавија кандидатури за учество,“ рече Перински.

Говорејќи за Ресурсниот центар за поддршка на општините, министерот објасни дека целта е сите општини да имаат пристап до потребните ресурси, без поделба на мали и големи, рурални и урбани. Најголем предизвик, како што рече, останува недостигот од човечки капацитети.

Со поддршка на УНПД, донација од Швајцарската амбасада и преку проектот на ЕУ „ЕУ за општините“, креиран е буџет од 500 илјади евра. Средствата ќе бидат наменети за експерти кои ќе им помагаат на општините, а ќе се исплаќаат само доколку бидат ангажирани, без нови вработувања.