Адем Чучуљ е избран за нов претседател на ДКСК со едногласна поддршка во Собранието
На денешната седница на Собранието, Адем Чучуљ беше избран за претседател на Државната комисија за спречување на корупцијата (ДКСК). Тој доби 82 гласа од вкупно 82 присутни пратеници.
Поддршката за кандидатот ја најави и пратеникот Ѓорѓија Сајкоски од ВМРО-ДПМНЕ. Тој пред гласањето рече дека „Чучуљ навистина може да ги зајакне капацитетите и репутацијата на ДКСК“.
Чучуљ е дипломиран правник, со положен правосуден испит и речиси две децении работно искуство во Комисијата. Моментално ја извршува функцијата генерален секретар. На селекцијата доби највисоки оценки – 96,5 бодови. Оценувачите нотираа долгогодишно практично искуство во областите спречување корупција и судир на интереси. Тој исто така има јасен план за развој на институцијата.
Процесот за избор започна уште летово, но беше прекинат поради локалните избори. Од 13-те пријавени кандидати, во потесниот круг влегоа 10.
Чучуљ ја презема функцијата од Татјана Димитровска. Таа се повлече по обвинувањата во случајот „Адитив“ за оддавање службена тајна и компјутерски фалсификат.
На истата седница, по усвојувањето на дневниот ред, Собранието ги избра Ана Тромбева Гавриловска, Марко Спасов, Мурат Алиу, Бертон Сулејмани, Агим Хазири и Никица Мојсоска Блажевски за членови на Националниот совет за високо образование и научно-истражувачка дејност. Исто така, беше донесена одлука за објавување оглас за нови членови во Комисијата за спречување и заштита од дискриминација.
Седницата продолжи со расправа по предлог-одлуката за основање Анкетна комисија. Оваа комисија е за утврдување на околностите во постапувањето на институциите при трагедиите и несреќите во државата.