Српскиот претседател Александар Вучиќ изјави дека, според него, воената соработка меѓу Хрватска, Албанија и Косово е насочена исклучиво против Србија. Тој додаде дека во случај на ескалација на конфликтот со Русија „не се знае кои и колку војници ќе мора да одат на источниот фронт“, а Србија како неутрална држава би била изложена на притисоци од „неименувани сили кои би сакале да ја прегазат“.
Говорејќи за впечатоците од годинашната Минхенска безбедносна конференција, Вучиќ изјави дека „сите зборуваат дека сакаат мир, а всушност сите го сакаат поразот на другата страна“. Тој додаде дека Србија, како што тврди, добила дозвола од „една моќна земја да се вооружува со нејзините ракети“, без да открие дополнителни детали, пренесе „Нова“.
Вучиќ изјави и дека европските претставници, според него, повторуваат дека војната во Украина наскоро ќе заврши со пораз на Русија. За провладините медиуми рече дека во моментов е тешко рационално да се разговара со Европејците, бидејќи, како што наведе, не ја гледаат другата страна на конфликтот, односно бројот на загинати Украинци и фактот дека Украина добила значителна воена помош од Западот.
„Сите зборуваат за стратешки пораз на Русија. Можно е да имаат право, но јас не сум сигурен каде тие ја гледаат својата победа. Ги прашав дали мислат дека војната може да трае вечно или дека Русија може да си дозволи да изгуби“, изјави Вучиќ. Тој додаде дека Европа, како што рече, почнува да зборува со поголема самодоверба за својата улога во глобалната политика, и преку јакнење на конкурентноста и преку вооружување.