Со видео надзор против дивите депонии во Охрид
Охрид започнува системска борба против дивите депонии преку воведување видеонадзор на најкритичните точки во градот. Согласно најавите, ќе бидат инсталирани вкупно 30 видеокамери на локации каде најчесто се забележува нелегално одлагање отпад, со цел навремено детектирање и санкционирање на прекршителите.
Камерите ќе служат како доказ за казнување
Поставениот видеонадзор ќе овозможи идентификација на лицата кои несовесно фрлаат отпад, а видео-снимките ќе се користат како официјален доказ при изрекување парични казни. Како што информираат надлежните, досега се мапирани околу 30 микро-локации каде проблемот со дивите депонии е најизразен.
„Планираме, детектирани се околу 30 микро-локации на кои ќе биде поставен видеонадзор, за полесно да можеме да ги детектираме сторителите. Во изминатата година можам да ви појаснам дека имаме подигнато околу 1.200 метри кубни кабаст отпад, нешто повеќе од 1.200 метри кубни градежен шут и околу 800 метри кубни зелен отпад“, изјави Стевчо Маслов, шеф за јавна хигиена во ЈП Охридски Комуналец.
Граѓаните ја поддржуваат мерката
Жителите на Охрид сметаат дека поставувањето камери е позитивен и неопходен чекор, оценувајќи дека со изрекување парични казни ќе се придонесе за зголемување на еколошката свест. Постојаното појавување на диви депонии, велат надлежните, сериозно го оптоварува работењето на комуналното претпријатие и претставува закана за животната средина и здравјето на граѓаните.