Коалицијата ВЛЕН побара објаснување од Бујар Османи за средбата во Унгарија со поранешниот премиер Никола Груевски. „Што побаравте од него, кој избега од правдата“, стои во нивното соопштение.
Според ВЛЕН, Османи нема кредибилитет да зборува за ветинг и реформи, ниту пак да проповеда политички морал. Во реакцијата се наведува: „Човекот што е оптоварен со бројни ревизорски извештаи за злоупотреби, човекот вмешан во отворени досиеја на СЈО, човекот што како министер даде зелено светло за влезот на МТЕЛ, распродавајќи ги албанските интереси. Тој е истиот министер што им дозволи на српските и црногорските компании да добијат лиценци за управување со бизнисот со казина, претворајќи ја државата во терен за странски олигарси.“
Во истото соопштение се додава дека Османи избегнува соочување со сопственото политичко минато, но сепак настапува со пораки за морал и реформи. „Зошто Албанците беа посиромашни, помалку застапени и повеќе разочарани од кога било за време на вашата Влада. Албанците веќе ја разбраа вистината. ДУИ повеќе не е политичка куќа или заштитник на националните интереси, туку структура што постои само за да го спаси образот на неколку дискредитирани поединци“, порача ВЛЕН.
Османи, пак, пред два дена одговори на новинарско прашање во врска со тврдењата дека побарал помош од Унгарија за подобрување на односите со ВМРО-ДПМНЕ. Тој ги оцени ваквите обвинувања како „смешни спинови“.