Минимална плата од најмалку 450 евра како гаранција за заштита на најранливата категорија на населението, како и за спречување на одливот на работната сила, исплата на трошоците за храна на сите вработени во висина од 20 отсто од просечната плата, како и исплата на трошоци за превоз на сите вработени во висина на реалните трошоци за доаѓање и враќање од работа – се главните приоритети, велат од Сојузот на синдикати на Македонија (ССМ).
Раст на платите и заштита на работниците
Градење на системско решение и обезбедување на континуиран пораст на платите во приватниот и јавниот сектор врз основа на егзистенцијалните потреби на работниците и нивните семејства, како и реалната состојба на економските и пазарните параметри, економскиот развој, инфлацијата, трошоците на живот и цените на основните животни продукти, е основното барање од кое ССМ нема да отстапи и во наредната година.
Зголемување на платите на вработените во јавниот сектор согласно Општиот колективен договор за јавниот сектор, минимална плата од најмалку 450 евра како гаранција за заштита на најранливата категорија на населението, како и за спречување на одливот на работната сила, исплата на трошоците за храна на сите вработени во висина од 20 отсто од просечната плата, како и исплата на трошоци за превоз на сите вработени во висина на реалните трошоци за доаѓање и враќање од работа – се главните приоритети, велат од ССМ.
Промени во работните услови
ССМ ќе се залага и за потпишување на Општиот колективен договор за приватниот сектор, за ограничување на работата на определено време во исклучителни околности и на максимум една година и преферирање на работата на неопределено време како одраз на егзистенцијалната сигурност на работниците, право на неработна сабота и зголемена контрола на прекувремената работа, но и намалување на полното работно време на 35-часовна работна недела, за да се создадат можности за похумана работна средина и повеќе време за одмор на работниците.
Работни часови и стратешки проекти
ССМ не отстапува од барањето за укинување на 72-часовната работна недела за работа на стратешките проекти (Коридорите 8 и 10д), кои беа воведени без социјален дијалог, со злоупотреба на Европското знаме за заобиколување на процедурите во Парламентот за да нема консултации со социјалните партнери и синдикатите.
Породилно и родителско отсуство
Се бара и зголемено породилно отсуство, поголеми родителски права и поголеми права и флексибилност за усогласување на семејните прилики и потреби на работниците со потребите на работниот процес, соопштија од ССМ.