Стопанската комора на Северна Македонија по повод стогодишниот јубилеј издаде монографија во која посебен фокус е ставен на личностите значајни за бизнисот во државава, како и компаниите што се дел од оваа бизнис асоцијација. Во Монографијата се објавени и информации за имплементацијата на проектот „Комора на иднината“.

Во соопштението од комората се посочува дека во Монографијата за Стопанската комора на Македонија, изработена по повод 100-годишниот коморски јубилеј, посебен фокус е ставен врз личностите значајни за бизнисот во Македонија, компаниите кои биле или се`уште се дел од најголемата и најбројната бизнис-асоцијација, низ призмата на добиените коморски награди во последните 25. години од кога последен пат била издадена коморска монографија, учеството во органите и телата на комората, иницирањето и предлагањето разни мерки, иницијативи и приоритети значајни за економскиот напредок. Во Монографијата се споменуваат, како што стои „Свето Пивара, Нако Кожара, Савка Европа, Симе Витаминка, Андреја Макпетрол, Страшо Гранит, Шевки Ренова, Штерјо, Џобе, Пашата, Туџар, Даути, Бишев…, но во Монографијата ќе прочитате за уште 500 значајни ликови кои вградиле дел од својот живот во развојот на македонската економија“.

-Комората немаше да биде она што е денес, ако не ги следеше потребите на бизнис-секторот. Тоа значи постојано да си „на штрек“, будно да ги следиш нивните проблеми, да бидеш во процес на постојана трансформација и на крајот, заедно со нив да растеш и да се развиваш. Затоа, свое место во монографијата наоѓаат и податоците поврзани со имплементацијата на проектот „Комора на иднината“ од страна на актуелните бизнис-лидери и стручната служба, опфаќајќи ги нивните размислувања и погледи кон иднината и фокусирањето на неколку клучни приоритети и специјализирани коморски услуги кои се клучот за натамошниот развој. Комората на иднината не нуди се и сешто, туку нуди точно определени услуги за компаниите, кои ќе го помогнат нивниот натамошен развој, извозните перформанси, ќе им овозможат да добијат соодветен кадар, ќе ги поврзат понудата и побарувачката….. Тоа се всушност Берзата на трудот, Институтот за извоз, Школата за бизнис лидери, електронските извозни трговски документи…, се наведува во соопштението.

Од Комора посочуваат дека стогодишнината од Комората претставува мост на две генерации, мост каде завршува ерата на една поискусна генерација и започнува ерата на новата генерација која успешно го продолжува имплементирањето на концептот „Комора на иднината“. Дел од нив, и младите и возрасните, и големите и помалите, и домашните и странските бизнисмени ги гледате на овие фотографии.

Концептот „Комора на иднината“ претставува одговор на потребите на бизнис- заедницата да има силен партнер, кој со своето знаење и со експертизата ги рефлектира современите трендови и практики на дејствување во брзо и динамично општество. Клучна промена во трасирањето на патот кон Комората на иднината е формирањето на Советите со фокус кон развој, иновации и знаења. Се разбира, во пазарно ориентирани услови и функционирање на правната држава, наведуваат од Комората.

Нашата цел, како што стои, е членките да се чувствуваат горди што се дел од најстарата и највлијателната бизнис асоцијација во нашата држава.