Основниот кривичен суд во Скопје денеска продолжи со судењето против поранешните директори на Клиниката за радиотерапија и онкологија, Нино Васев и Нехад Нухи, за несовесно работење и финансиски криминал. Обвинението ги товари со злоупотреби и незаконски набавки на лекови кои, според тврдењата на обвинителството, го оштетиле буџетот на Клиниката за речиси 36 милиони евра.
Сведоци ја објаснуваат улогата на Управниот одбор
Првиот сведок, лекар и член на Управниот одбор на Клиниката во периодот 2017–2023 година, рече дека Васев и Нухи присуствувале на седниците, но не ги информирале членовите за економските и набавни активности.
„Ние бевме доктори, а економистот ни образложуваше бројки и податоци на кои се базираа одлуките на Управниот одбор“, изјави сведокот.
Тој исто така даде детали за апликациите за имунотерапија и биолошка терапија на пациенти, појаснувајќи дека се применуваат според точни медицински критериуми.
„Лекот Херцегпин не се аплицира кај пациенти кои се RH негативни“, додаде сведокот.
Вториот сведок, исто така вработен на Клиниката, се осврна на пациентите кои ги лекувал и на условите за примена на терапиите.
Обвинителството, застапувано од Ана Гоговска Јакимовска, го сослушуваше сведочењето како дел од доказната постапка, која продолжува на 6 ноември со повик на дополнителни сведоци.
Обвинетите негираат вина
На почетокот на судењето, Васев и Нухи ја негираа вината за делата. Одбраната тврди дека обвинението е неосновано и политички мотивирано, базирано на економско вештачење од лица кои самите се инкриминирани и биле сменети од Васев.
Претходно, Кривичниот суд го одобри обвинението против поранешните директори за злоупотреби, измама и проневера во службата во периодот од 2018 до 2022 година. Покрај „Онкологија 2“, против Васев и двајца онколози се води и случајот „Онкологија 1“ за несовесно лекување на пациенти.